កម្មវិធីមត្តេយ្យភាសាខ្មែរ

ដើម្បីធានាបានការអប់រំប្រកបដោយបរិយាបន្ន សមធម៌ គុណភាព និងលើកម្ពស់ការសិក្សាពេញមួយជីវិត សម្រាប់ទាំងអស់គ្នា ជាពិសេសក្នុងកំណត់ចំណុចដៅត្រឹមឆ្នាំ២០៣០ ធានាថា កុមារទាំងអស់ទទួលបានការ អប់រំកម្រិតមត្តេយ្យសិក្សា ការថែទាំ ការអភិវឌ្ឍកុមារតូចប្រកបដោយគុណភាព ដើម្បីពួកគេបានត្រៀមខ្លួនជាស្រេចចូលរៀន នៅកម្រិតបឋមសិក្សា កម្មវិធីសិក្សាមត្តេយ្យសិក្សា មានគោលបំណងរួម៖

ក. កាយសម្បទា

- មានសុខភាពល្អទាំងផ្លូវកាយ និងផ្លូវចិត្ត

- មានថាមពលបរិបូរណ៍ កម្លាំងពលំមាំមូន ទាំងកាយ ប្រាជ្ញា និងស្មារតី

- វាងវៃ ស្វាហាប់ អង់អាចក្លាហាន និងរហ័សរហួន។

ខ. វិជ្ជាសម្បទា

- ស្គាល់ ចំណាំ ថាតាម ហៅឈ្មោះ និងអានតួអក្សរ ពាក្យ និងឃ្លាងាយៗដែលធ្លាប់ប្រើប្រាស់ប្រចាំថ្ងៃ។

- ចំណាំ គូសតាម ហៅឈ្មោះ រាប់ចំនួនលេខពីរខ្ទង់ និងស្គាល់រូបរាង ទំហំវត្ថុនានា និងរង្វាស់រង្វាល់

មួយចំនួន។

- ប្រាប់បានពីរបៀបថែទាំសុខភាពងាយៗ ដូចជាអនាម័យខ្លួនប្រាណ ការបរិភោគចំណីអាហារ។

- ប្រាប់ពីរបៀបបង្ការខ្លួនពីគ្រោះថ្នាក់ដោយចៃដន្យ ឬដោយធម្មជាតិ។

គ. បំណិនសម្បទា

- ប្រើប្រាស់ភាសាខ្មែរសម្រាប់ទំនាក់ទំនងប្រចាំថ្ងៃក្នុងគ្រួសារ និងសហគមន៍ ដូចជាការស្ដាប់ និយាយ និងប្រើសំដីសមរម្យប្រកបដោយការទទួលខុសត្រូវ

- ប្រើប្រាស់គណិតវិទ្យាដូចជាការចំណាំ រាប់ គូសតាម និងប្រៀបធៀប

- រក្សាអនាម័យខ្លួនប្រាណ ប្រើប្រាស់ចលករតូច ចលករធំ។

- សប្បាយរីករាយចូលរួមលេងល្បែងសិក្សា ក្លាហាន សកម្ម ចែករំលែក និងសហការ

ឃ. ចរិយាសម្បទា

- ស្រឡាញ់ខ្លួនឯង គ្រួសារ មិត្តភក្ដិ លោកគ្រូ អ្នកគ្រូ និងជនរួមជាតិ ស្រឡាញ់បរិស្ថាន វប្បធម៌ និងប្រពៃណីទំនៀមទម្លាប់របស់ជាតិខ្លួន។